Mursel BEK
Emser, cejna remezanî û cejna newrozî pê ser de bê. Çi şahîya weş, çi kelecanîya weş bî. Him keyan de him sûkan de kêfweşî bî çimke ruhê merdiman de coşî û kêfweşî bî.
Belê, cayê cejna remezanê cûyayîşê ûmetê îslam de girîng o. Nê rojê hîrê heminî ke mîyanê şahî û heskerdişî de derbas benê semedê efûkerdişê şexsan û binateyê merdiman de firsetêk yeno qebûlkerdiş. Ez hêvî kena due û nîyazê hemin kesan bêro ca û her kes bi ruhêko newe yew bînan dir têkîlî de bo.
Tabi cejna newrozî zî taybetî cûyayê şarê kurdan da cayê xo girewto. Birastî no roşan ey kurdan o labelê xecî kurdan şarê der û dorê Kurdan de sey Farisan, Armenîyan, Azerîyan, şarê Kafkasyan û ê bînan de cayê xo girewto û hetê nê şaran ra zî yeno pîrozkerdişî.
Sênîg ma hemin zanê newroz destpêka serra newe yo. Bi şahî û kêfweşî dir destpêkerdişê xebatan o. Wa na malûmat cayê xo de vindero.
Belê, hîkayeyê newroz zî est a û bîya yew metafor. Hîkayeyê Kawayê Hesinkarî, şarê ma hemin zanî û pê na hîkaye rê îman ardo. Ez tîya de nê behsa zulûmkar Dehaq kena nê zî behsa Kawayê Hesinkar kena. Heke hewceyê behskerdişê Kawa bibo zî ganî ez behsa Kawayanê hemdemanî bikê. Nê Kawayanê hemdemanan ra taybetî zî behsa xortî û keynayanê kurdan mîyanê înan de zî taybetî behsa xortî û keynayanê çewlîgî bikî.
Ez gellek fikirya ya. Mi va ez sênî binûs ke mafê nê lehenganî/qehremananî nêwerî. Hetanê kelecanîyê canê mi ez ca verdaya mi o gama biryar da û mi va ez sebikî zî nêşkarena a coşî û waharvecîyayîşê înan bîyarî ziwan. Ayê didi zî mi va nê gencê gelê kurd zemano ma ra ver de xo bi hîşarîyê xo hemin çîyan û cayan de mojnenê ma, ked û emegê xo verê çimanê ma de fînenê ra. No semed ra mi zî têna çendî tespîtê xo yê meydanê newrozî ardî ziwan.
Çîko en vernî no yo ke ez vacî û dima tespîtanê xo rêz bikî. Homa sihat weş, emir derg bido xort û keyneyanê şarê ma. Semedê pîlanê ma, taybetî zî dadîyanê ma yê ser siba ra hetanî şew behsa aşitî û azadî kenê înan ra zî na due wazena. Homa înan ma ser ra kêm nêko.
Herî zêde newrozê înan pîroz be!
Newrozê Çewlîgî ra çendî tespîtî.
- Nifşa newe her ca de bî û şahîyê Newrozî xûrt kerdenê û kêfweşîyê xo motenê ra.
- Tûtanê/gedeyanê dewijan ziwanê xo dir qalkerdenê.
- Pîlan û rêveberan (mixabin) Tirkî dir qalkerdê labelê verê fekî ber de ombazan bi ziwanê Kûrdî, xêr ameyîşê şarî kerdê.
- Kelecanî şarê ma de bî.
- Tayê merdiman safî fotograf antê. (Badê cû destê xo eştenê telefonan û medya civakî de ca de parvekerdinê.)
- Sloganê “Jin/Jiyan/Azadî” xortan eştenê. (Zef dorî înan dest kerdenê pê, kênan û xaniman dima ameyenê.)
- Hûnermendê mîyanê ma de cüyenê performanso weş mote ra. (Ez qayîl nîya vacî hûnermendê heremî/yerel sanatçı çimke no xeta yo, şerm o.)
- Dadîyan/cinîyan xo bi renganê netevîyan xemilnabê labelê zef tayê camerdan bi şal û şapikê pêy kerdebê.
- Şilî/varon herindê awê panzeran girewte bî labelê aye zî neşkara kelecanî û adirê şarê ma honake.
- Heval Mazlum û Zeynep Xan weş xebat kerdê. (Çewlik.net zef weş xebat ya û xeberê germin serê medya civakî de şarê ma rê parve kerdo.)
Semedê ked û emegê Komîteyê Newroz ê Çewlîgî, hûnermendî kê beşdarî şahî bîyê zerri ra spas kena. Weş û wahar bibenê!
Newroz ma heminan rê pîroz be!
Ma hezar newrozan bibînî!
