Mursel BEK
Badî çend rojan, roceyê remezan qedîyeno. Kamî roce girewto, Homa înan ra qebûl biko. Duayê germin ke her roj zerreyê mi ra derbas bênî, reynê Yezdanê dilovan ra wazena: Homa riziq hîrayîyê aşmê remezan ma ser ra berz nêko, heskerdiş û parvekerdişê ma bizêd no, merdimatî hemin cayan de bingehî ko, şarê ma kûlî derd û belan ra bihafiz no.
Babetê mi aşmê remezan û roce yo labelê ûmûmî de hemin ol, mezhep, fikir û bawerî mi bar de qedir berzî. Çimke ez zana ke bawerî û pawetişê fikirê merdimî, çita rê beno, çi ol rê beno wa bibo ihtîyacîyê insan a girîng anê ca. Zerreyê merdim kenê germin, hîşê merdim kenê zelal. Hetê civakî de zî binateyê merdiman de çi xiravî est ê, kene pîr û pak; tekîlîyê merdimatî kenê newe. No semed ra rûmet dayîşê hemin razberîyan/manevîyan mi bar de estê û hemin bawerîyan û bawermendan ra hürmet mojnena ra.
Belê, mi va bawerî îhtîyacî ya û merdim rê feydayin a labelê no têna bi aşmê remezan rê sinor nêbo. Ganî no feyda, cûyayê ma ra vila bo û her tim bidomo. Ma aşmê remezan de sinî başî û holî pawenê, xiravî û nebaşî ra dûr vindenê, qeleyê/loqê fekî xoyî, der û dormaleyê xodir parkenê, zûr û viran ra ziwanê xo pak genê, halê merdimanê feqîran fikiryenê, şefqet û merhemet kesan ra moşnenê ra, semedê eyban û ûziranê xo, yew bînan ra bexşinî/efûkerdiş wazenê remezan ra pêy zî ma ganî hîna bê. Ganî ma no fem û fîraset her rojan rê vilakê, her şert û mercan de bipawî, bicûyî. Heke ma hîna nêkî, qîmetê roce, nimaj û teatê remezan nêmaneno, ked û emegê aşmê remezanî zî bîla sebeb, bîla heq şinê. Zaten ma holî û başîyê remezanî ca verdî, yeno o mena ma pêy çendî rojan xo xapînenî. Xo vîr ra mekenê beno ke ma xo bixapînî la çew nêşkareno Homa bixapîno.
Mixabin şarê ma de zef merdim kêm fikiryenê û bixeta tê gerenê. Aşmê remezan an zî rojêka fîraza bîn de başî la ê rocî biqedî, her çî war de verdenê. Înan ra gêrî defterê emalanê merdim ca de pak beno û merdim eşkareno xeta û eyban reynê biko. Belê, elbette rehm û mexfîretê Yezdanê Dilovanî bêsînor ê labelê ma nêşkarenê kêfî têbigerî. Ganî başî û holî zerreyê ma ra çirrê nêvecîyê û ma tim û tim merdiman dir holî û başî de bîyerî yew ca. Heke ma hîna nêkî yeno o mena, him bawerîyê ma de him zî merdimatîyê ma de kemasî est a.
Belê, ma reseyê pênîyê aşmê remezan û badî çend rojan cejna remezan yena. Ez hêvî kena haskerdiş û empatîyêka ma xêrî roce û nîyazê aşmê remazanî girewtî wa tim û tim ma dir bê. Feydayê nînan ê civakî, ma vîr de bî û ma bi çîyê wînayan merdimanê bînan dir têkîlîyê xo tesîs bikî. Heskerdiş, hürmet dayîş, rindî û başî ma her ca de yew bînan rê bimoşne ra.
Tîya de ez wazena çîkê dubare zelal bikî. Mi nêva têna aşmê remezan de başî û holî estê, merdimo roce geno baş o û ê bîn nebaşî. Elbet rojê ol û oldarîyê her kesan an zî şaran tewir tewir î. Oldarîyê her kesî binateyê ey û Homayî do. Heqê ma çinîyo çewî şîrove bikê. Hatta ez eşkarena wacî merdim est o ke bawerîyê ey çîki ra çinîya. No zî normal o, çimke her kes bawerîyê xo de serbest o. Bawer biko zî nêko zî gorayê xo baş o, nebaş o. Bawerî cîya ya kesayetî/şexsîyet cîya yo. Derdê mi, rojanê evzelî sey aşmê remezanî de kesî baş benê la bade cû her çîyan kişte de nanê ro, hîşarîyê û rexnekerdişê înan o. Nîyetê mi domnayîşê başî û merdimatî yo.
Belê, merdim ganî her roc de başî, holî, heskerdiş, parvekerdiş de bo û semedê awankerdişê nê çîyê başan ked û emeg bido. Heke merdim hîna hol bo, her roc beno roşan, her ca beno bihûşt. Nê xirabî, nê koyîş û kiştiş nê zî şerr û pirûdayîş manenê.
Her deman ra zefîyêr nê demanê pênîyan de hewcetîyê ma başî, holî û merdimatî est o. Homa ma û şarê ma şerr û şerrûdan ra bipawo, xirabî û pêrîşanî ma ra dûr bero. Ez bawer kena o gama roşan beno roşano raştikîn.
Roşanê ma fîraz bo, her rocê ma temê roşanan de bivîyêro.
