Wezîrê perwerde dîyar kerdo, va ma do betalîya/tatîlê mîyanteyan berz bikê. Mixabin…
Çi biryarêko xelet…
Ez bawerkena roja avankerdişê pergalê perwerde ra hetanê ewro biryaro bifeyda û zanistî betalîya mîyanteyan bo labelê o biryar zî beno berz.
Çira bi feydabo?
Her merdimî de sînorê tehamûl est o. No sînor goreyê darê merdiman bedilyeno. Tayê merdiman de bi rojan yeno vînayîş, tayê merdiman de bi aşman/mengeyan yeno vînayîş. Wendekarî zî wina yê. Wendekar est o çewres roj ra pê xitimyeno, wendekar est o di aşman, wendekar est o hîrê aşman ra pê xitimyeno. Nê hetê hîşe, nê hetê derûnî/psîkolojî, nê zî hetê quvet û qudretê xo ra wendekarî nêeşkarenê bixebitê. Çîkî nê kewenê sarreyê înanî. Gama wendekar wina bo ganî her hetî dir bînê xo bîgero. Yanî betalî ey/aye rê bena ferz.
Biryarê betalîya mîyanteyanî, wendekaran rê sey derman bî. Mixabin bikê berz zef zirar dîyeno wendekaran.
Sênî ke her kes zanê, çend hewteyê verî, no babet ser xeberêk erzîya werti la nêdomya. Wezîrê perwerde têna va, na mesela ser, çendi gerreyî/şîkayetî resayê ma labelê ma semedê berzkerdişê na mesela hima biryar nêdayo. Nika dîyar/kifşe biyo, wezîrî waşto biryarê berzkerdişî hêdî hêdî ma rê vaco. Waşt o, rayê mûsnayîşî dir no biryar ma rê bido qebûlkerdiş.
Çira betalîya mîyante bena berz?
Meneyê/bahaneyê ma rê vatibo nê bê: Meneyê yewîn gerreyê/şîkayetê dadî û babîyan be. A yê didêyan zî gerreyê mamosteyan be.
Goreyê meneyê dadî û babîyan tûtî keye de rehet nêvindenê, ders nêxebityenê. Semedê betalî û nerehetîyê înanî ra wa tûtî şorê dibistanan. Çiqa eyb o. Çîko merdim pê bihûyo no yo. Yanî vanê “Çira betalî de wendekarî betal vindenê?” Çew wazeno bivengo berz biqêro vaco “Zaten mantiqê betalîya mîyanteyîn no yo. Ganî tûtî bînê xo bîgerê!”
A yê mamosteyan zî wina bo: “Binate ra pê, gama wendekarî yenê dibistan, baldarîyê înanî a yê ser dersan beno tay û ma nêşkarenê baldarîyê wendekaran bido dersan û babetan ser. Ma zef zorî ancenê, nêeşkarenê çendî rojan tûtan sey betalî ra ver motîve bikê. No wazîyet zirar dano wendekaran.”
Zirt zûr ê. Hûrdhemin fikir zî pûç ê û têkîlîyê nê fikiran û zanistî yewbînan dir çino.
Ez bawerkena derdê wezîret dergkerdişê betalîyê amînan o. Wazenê tûtan lezûbez bierşawê kargehan û o ca de bixebitnê. Çimke ma pêrû zanê dewletê ma de xebatoxê tûtî zaf ê. Derd û kulê înan zeyîfkerdişê têkîlîyê tûtan û dibistanî yo. Wazenê tûtanî dibistanan ra, wendişî ra serdin kê. Wazenê tûtan dibistanan ra cîyakê, dûr kê û înan sey koleyan bierşawê kargehan û ê cayan de bikê karker. Çimke pergalê dewlemendan, sermayedaran rê xebatoxê ercan lazimê. Çimke sênî ke yeno zanayîş mixabin Tirkîye de emegê tûtî û cinîyan ercan ê. Him emegê înan ercan ê him zî pê nê însanan zef gurî beno.
Heyf o, guna yo, wina mekenê!
Tûtî, vernî hemin çîyan merdimî/însanî. Hewcetîyê înan est ê û ganî hewcetîyê înanî bêrê ca. Sey tûtî, sey kaykerdişî, sey feşî û kêfweşî, yarî û hûyayîşî, nerehetî û şêtanî…
Heke nê hewcetîyê tûtan bêrê astengkerdişî merdimatîyê/însanetîyê înan kêm manena. Taybetî zî hetê rûhî de kêm manenê, benê sey robotan. Nê cûya ra tem genê, nê tem danê cûyayê çewî. Ma vaco bi qêdeko bîn, sey zor û zordarî dersan de serbikewe zî merdimatî de ser nêkewenê. Çi meslek bibo, wazen bijîşkî/doktorî, wazen mamostetî, wazen parezgerî, wazen erdnîgarî bo, gûrî û karê xo ra tem nêgenê, xizmetê xo weş nêanê ca. Bixebitê zî têna semedê peran xebatyenê, bêzerreyê xo şarê rê feydayîn nêbenê.
Bangawazîyê ma wezîrî rê na ya: Destê xo giraneyê tûtan ra vera de. Vera de wa tûtî bîn/nefes bîgerê û tûtîyê xo bicûyî. Wa tûtîyê xo bicûyê ke merdimatîyê xo zî bicûyê û feyda bidê merdiman û hemin merdimatî.
