Nê di hefteyan de nûçeyê balkeşî qewimî. Hûrdihemin zî weşî û kêfî ser ra yê!
Nûçeyê verîn zîyaretê Hevserokê DBP’yî Çiğdem KILIÇGÜN UÇAR’î ya. No hewte/hefte, mêvanê ka giran Çewlîg de bîye: Hevserokê Partîya Herema Demokrat birêz Çîğdem KILIÇGÜN UÇAR’i ameye zîyaretîyê şarê Çewlîgî. Armancê aye, derheqê raverî/pêşerojî (süreç) ser bîye.
Serok Çîğdem, hîre rocî/rojî Çewlîg de tewir tewir cayan de beşdarê bernameyan bîye. Bernameyî, mîyanteyê bajer de destkerdo pê û dima dew û navçeyanê bajerî de domyayê. Nê bernameyan de behsa xebatê partîyê xo kerde û şarê çewlîg ra paştdayîş waşte.
Qisedan û aşkereyê Çiğdem Xan ra dima, şarê çewlîg û nûnerê sazîyan persê xo kerdê, fikir û aneyayîşê xo ardê ziwan.
Hemin cayan de xebat atmosferêko germin û gonî de bîye. Dima xebat ra Serok Çiğdem Xan Çewlig ra bîye ca û ver bi Amedî şîye.
Pênîya na yewbînvînayîşî de dîyar bi ke, şarê Çewlîg na raverî ra memnûn ê û wazenê hetanê serkewtişî mîyanê na xebat de bê. Serok Çiğdem Xan zî zîyaretîya Çewlîg ra memnûn cîya bîye û zerweşîyê xo arde ziwan.
Nûçeyê dima zî veng û rengê mîhrîcanan ser ra ya.
Nê di hewte, hetê çand û hûnerî de Çewlîg û herem, gellek bereketin bê. Her ca de mîhrîcan virazeyê. Têna mîyanteyê bajerî de nê, navçe/qeza û dewan de zî vengê hûnermendan û musîk berz bîyê. Rengê mîhrîcanan sûk û dewan xemilnayê. Her mîhrîcan de yew pêyamo esasî/tema ame dayîş.
Welatîyan waharîyê nê xabatan kerdo, bi kêf û coş de dem vîyarna, stres eşto û enerjî kom kerdo. (Tîya de ma heqêk teslîm bikê: Kamî ked û emeg da nê xebatan Homa înan ra razî bo, vengê înan zelal, zerreyê înan weş bo.)
Hetê organîzasyon ra kêmasîyê nê mîhrîcanan helbet est bî. Kamî nê xabatî saz kerdê semedê çareserîyê nê kemasîyan mihaqaq fikir û pêşnîyazê xo vatê û seranê ma ra ver de çare kenê.
Bîyayîşê kêmasîyan normal o la yew xal/nokta est a kêmasî ra wetîyêr girîng a/mûhîm a. Ganî ma na xal ser ra vinderê: Waharvecîyayîşê ziwanê Kurdî…
Ziwan her ca de wahîrvêcîyayîş wazeno. No semed ra şarê ma ganî hemin cayanê cûya de ziwanê xo dir qal bikê. Çimke ziwanê merdim; nîşan, reng û nasnameyê merdimî yo. Tabî her kes na yê zano labelê karardayîş de yanî pratîk de her kes zayîf o. Na rewşe bena sebebê nêweşî. Mixabin ziwan bêwahîr maneno û têna bi karardayîşê sloganan de hafsî beno.
Çare çito?
Ganî hemin mîhrîcanan de peyamo esasî tim û tim ziwanê dadîyan bo. Organîzatorî, pêşkeşvanî, hûnermendî nê peyamî aşkere bîyarê ziwan û Kurdî qal bikê. Rûmeto ke/qîmeto ke danê ziwanê Kurdî bimojneyê ra. Çimke ziwanê ma no qeyda berz beno, newe ra ganî beno û mîyanê ziwanan bînan de sey gula sor cayê xo geno û bi dewlemendîyê xo cûyeno.
Kêmasî, yê ma heminan a. Ez rica û dexelet kena. Hel na hel a, her ca de waharê ziwan vecîyenê!
Her têkîlî de, kêf û coşî de, derd û kûlî aşkere kerdişî de, veyveyan de, roşanan de, keye de, sûke de, dayîşûgirewtişî de, mizgeftan de, ceman de vengê Kurdî berzbikê!
Xo vîr ra mekê: Her ziwanî, sewtê Homayî yê û ganî her ca ra vila bê!
Bimanê weşî de, bimanê Kurdewarî de, bimanê reng û şewqê ziwanê Kurdî de!
