Demsal, ver bi payîz raye girewto. Waye, bajer de bîyo wenik; dewan de hêdî hêdî bîyo serdin. Waye, xeberê agerayîş her ca ra keno vila. Kesêk ameyê dewan, ageranê keyanê xo. Keyeyê înan bajeranê pîlan, bajerêk pîzzeyê xo mird kenê.
Kamî agerenê, mîyanê xemgînî de, xem û xeyalanê reynaameyayîş de agerenê. No rewşe mojnenara çew bi kêfî welatê xo nêterikneno.
Belê… Otogarî qerebalix ê. Her ca ra vengêk berz beno. Bermayîş, bêmoralî û virarşîyayîşî bal/dîqqet ancenê. Mîyanê na vînayîş de torbeyê gird û hettanî verêfek pir ê û fekê xo zixma girewteyê zî kewenê verê çiman ra.
Nê çûwalê riziqê merdiman ê. Parê înanî dew ê. Kesekê ameyê dewe, agerayîş de destpir, bargiran û riziqzef agerenê. Nê çîyê debare înanê zimistanî yê û hewceya gird anê ca.
Elbet nê çîyî têna werd û pîzemirdkerdişî nênê hesapkerdişê. Heto bîn ra camerdîyê, parvekerdişê, heskerdişê yewbînan yê şarê ma û têkîlîyê binateyê malbatanê ma ramojnenê.
No parvekerdiş çîko baş o û cûyayîşa komînal rê wernagêko gandar o. Ganî ma wina bidomnê û hemin cayan ra vila bikê.
Belê… Na rewşe camerdîyê axa welatî, heskerdişê yewbînanî mojnena ra. Bereketin bo. Him sirfê înanî, him temenê/emrê înanî bereketin bê. Hêvîdar a ke hemin cayan de, waran de şarê ma wina paştdarê yewbînan bê û waharîyê yewbînan bikê!
Zerreyê înan germin, destê înan hîra bo!
