Yew…
Wisar ameyo, waye bîyo weş. Hemin cayan de vaş berz bo. Gul û sosinan sare berz kerdê. Semedê vînayîşê nê rindîyan û girewtişê vayo weş merdimî xo eştê teber. Verê germayîyê û şîfayê tîje de rûnişenê û bikêşweşî çay şimenê, werde wenê. Rind o, baş o labelê gama nê merdimî wirzenê we û hetê keyeyanê xo ra şinê, xo dima qireşî, gemar û tewir tewir çopan verdenê. Mixabin nê pîsî xoza ra vila benê. En zef zî çîyo plastîkî…
Nê qireşî him xoza rê him merdimanî rê him zî heywanan rê zirarin ê. Taybetî heywanan rê zef zirar ê çimke xoza keye înan a. Ganî merdim baldar bo û xo ra dim hemin çî û cayan sey verî war verdo. Cayo te de rûniştenê pak verdo çimke xoza de şîrikê ma zef ê. Helbet merdim xoza ra gêreno, kêf û eşq keno labelê ganî goreyê pergalê xoza têbigero û pergalê xoza nêxeripno.
Belê, merdim mecbûr ganî baldar bo û wina gam bi erzo. Mesela adir her ca de we nêko û gama biko we zî ganî binê kontrolê xo de bîgero. Heke merdim wina têbigêro heqê xo paweno û neheqîyê şîrikanê xo zî nêkeno. Merdim ancak wina xoza û temê cûyayê xoza heq keno.
Di…
Xoza dewlemend a. Reynê bîya gane û camerdîyê xo mojnena ma. Sedan vaş û vilikan, tar û pincaran dana ma. Nê çî him weşî him zî hetê bijîşkî/sihetî de bifeyda yê. Heke merdimî nebaş verdî…
Belê xoza dewlemend a û hemin ganeyan rê bes a labelê çimvêşan û duşmenê xoza nêverdenê ma biweşî û bihuzurî de feyda bivînê. Sermayeya lîşin/qirêş destê xo eşto ser dere û derxolan, aw û axan, vaye û koyanê ma. Wazenê ma cayanê ma ra, erdê bav û kalanê ma ra bikê.
Ê nayê wazenê labelê şarê ma zî hemberê na xirabî sare berz kerdo û semedê ver vindertişê înanî ameyê yew ca, bîyê yew veng û yew dest, nikûçê xo kerda berz. Gimgim û Kanîreş de şarê ma bi girseko rengin hêrsê xo ardê ziwan. Peyamo zelal da û va ma nê erdê xo, nê aw û deranê xo nê zî dar û daristananê xo danê şima.
Hîrê…
Hewteyo verîn de dibistanan de çendî bîyerê/olayê bîbê. Şarê Turkîya na mesele de nerazîyê xo nîşan da. Wezîrê hukumatî zî çareserkerdişê xo dîyar kerdo. Wina aseno cerdewan/korucu û bekçîyan dibistanan de bikar anê. Helbet no, semedê çarêk ame pêşkerdiş la ez bawerkena têna na gam, çareyo/dermano bingehî nêbeno na mesela de.
Mesela têna pirsgirekê ewlekarî/gûvenlîk nîya. Na bîyer/olay ganî her hetî ra bêro şîrovekerdiş û fikirê her pisboran bêro girewtiş. Heke nêko xeta beno û şikîyeno zerreyê merdim ke hukimat wazeno ca bido cerdewanan û tayê merdimananê xo bîgero kar. Çareyê înan çare nîyo. Heke na mesela wina werte de bimano hima zef bîyerî/olayî benê.
Çahar…
Şerrê Îran -ez nêwazena vacî Îran labelê nameyê xo pêy dizdî wina nayo pa. Çekûyê îran menayê xo yo esasî de “Aryen” o û nameyê yew şar/millet nîyo- û Emrîqa domeno. Mixabin zirarê şerrî her hetî ra xo mojneno ra. No babetêko bîno la ez wazena derheqê meselêya bîn bikî. Birastî na mesela zî giredagîyê no babetî ya.
Belê, şerr domyeno û ma hemin zirarê şerrî ancenê la çîk balê mi anto. Şerr destbêkerdo nêkerdo ma ser ra asuman/ezman pîr û pak o. Cûya verî, her roj yew ca ra teyare firedenê la nika teyarê ma ser ra nêfirenê. Teyarêk ke vatenê semedê rewşa vayeyî/meteorolojî firenê werti ra bîyêberz. Ez bawerkena dima vindetişê nê balafiran vaye zef pak bîyo. Merdim eşkareno rehet bînê/nefesê xo bîgero çimke vaye zef bîyo temîz. Miheqqeq tesîrê varanê wisar no pakî ser de esto la ez bawerkena raşta zî vindetişê balafiran/teyaran rewşa vaye baş kerdo.
Xoza bîya sey xo.
Pekî çira wina bi? Beno ke tayê merdimî vacê “no teorîya qomplo ya, çiko wina newîn çinî yo” la ez bi xo cîyayî/firqîyatê vayeyî/hewayî vînena, bîn girewtişî de xo dir vejena. Çimke ez pişikê xo dir nêweşa û pakîyê an zî qireşîyê/lîşinîyê hewayî zef hol zana.
Heke nê balafirî/teyareyî raşta zî asûman ra gaz û çîyo kîmyevî kenê war, ganî bêro astenkerdiş. Ez bawerkena na mesela her hetî ra girîng a. Hukimat, wa bijîşkîyê merdiman bîyaro verî çiman û nayê rê çare bivîno. Îdarekerdoxê Turkîya taybetî zî serokomar bîrêz Erdoğan, ganî na mesela ser vindero û her çî zelal ko.
Bimanê başî dir, bimanê başan dir!
