No hewte, roşan be. Ma çendî rojî bi kêfweşî û şahî derbas kerdê.
Bi rastî rûyê her kes hûyayîş de bo. Kam raştê kamî ameyene, verar şîne ey/aye bînî ra û heskerdişî nawitenê/ramotene. Der û dorê her merdim tesîrê holî, başî de be. Şahî û fîrazîyê roşanî zerre ra dabe teber. Merdim eşkarene vaco, roşan sey roşan ameye fîrazî.
Çendî rojan ra pey, ez bawerkena hemin çîyî bedilyenê. Têkîlîyê merdiman, eqrebeyan û cîranan benê sey verî. Her merdim kesayetîya xo ya raştikîn ramojneno. Rûyî bi têsîrê roşanî hûyebê, reyna benê serdin, ziwanî qala nerm û weş kerdene, benê wişk, tel, tûj û teliyin. Çimke ma hemin yew bînan ra dûr kewtê. Na dûrî zerreyê ma de serdinîyêka pîl viraşta. Ma hinde bîyê serdin, rûyê ma zî bîyo tirş. Ma çew hîn/hîdî hesabê biratî, cîrantî û eqrebatî nêkenê.
Mixabin sedemê no çîyî kêmasîyê heskerdene û qîmet dayene yo. Ma wareyê haskerdişî de bîyê kêm. Ma têna rojanê taybetan de benê nerm û yewbînan qebûl kenê, hesabê kesanê xêcî xo kenê, yewbînan rê heskerdeneyî ramojnenê.
Çira?
Çimke rewşa merdiman hol nî ya, çimke welatî de cûyayîş hol nî yo. Rewşa aborî hol nî ya, azadîyê fikir, raman, ol û oldarîyî çinî yo, mafê merdiman û demoqrasî welatî de çinî yo. Heywanan ra bîgerenê hetanî dar û dingî her çî zirar vîneno. Elbet nê çîyê rewşa welatî, tesîr danê merdiman, hîs û zerreyê merdiman kenê gazlete.
Mixabin ciwanan ra bîgerenê hetanê kal û pîran merdimî binê têngasîyê cûya da fatisyeyê. Merdim rojanê evzelan/fîrazan de nê çîyanê xiraban xo vîr ra keno an zî nêmojneno ra labelê rojanê bînan de mixabin reyna hetê hîs û moralî de keweno.
Çira heskerdiş?
Çimke heskerdiş çareyê hemin derdano, dermanê hemin nêweşîyo. Derd û kulî çinêbê zî çimeyê hêz/quvet û qudretî yo. Yanî heskerdiş enerjîyê laş û rûhê merdimano. No semed ra her dem û dewran de zerreyê merdiman de ganî bibo. Têna bîyayîşî nê, nawnayîşî zî ganî cûyayê her merdim de bi bo.
Belê, şahîyê roşanî bi heskerdişê zer weş a û rûhê merdimî her hetî ra mirde kena labelê her rojî zî ganî wina bo. Tim û tim rû/rî, ziwan û têgêrayîşê merdim de bibê. Heke merdim her roj sey roşan bivîno, merdimanê der û dormaleyê xo ra hes biko, o gam her rojê eyî/ayeyî benê sey roşan. Bêgûman roşan zî o gama beno roşano raştikîn.
Heskerdiş, ziwano nerm, qala weş, sûreto bi hûyayîş, zerreyê merdimî mojnena ra. Heke kamî de nê çîyî çinîyê, ganî tobedar bo. Wa vaco “Ez ewro ra têpîya, paşt nêdana merdim û sazîyê bîyê sedemê nê çîyê nebaşan û rewşa xo!” û ewro ra pê hîş û fîrasetê xo rê waharî biko. O gama her çîyî benê sey verî. Heskerdiş û hûyayîş, ewil zerreyê ey/aye de sare dano teber, bade cû rûyê ey/aye de xo mojneno ra. O gama merdimî zî benê a yê verî, têkîlîyê merdiman zî, roşan zî …
Ganî no çî vîre ra nêşîro: Nê çîyî pê hîşarî yenê werte, pê zanayîş û waharîyê aqil û hîş yenê meydan. Heke merdim cûyaya ûmûmî de bizano têbigero, her rojê aye/ey benê roşan, her rojî de hûyayîş rûyê ey/aye de daliqyeno.
Bimanê weşî de, bimanê heskerdişî de.
