Mursel Bek
Merdimê no demî zaf bedilyo. Her çî goreyê menfeatê xo keno, usul û qêdan ra dûr kewto. Beno ke şima vanî dem/zeman bedilyo, no bedilyayîş zî normal o. Raşt o dem bedilyo, ewro ra dima zî do bibedilo la bedilyayişo ke ez behsê ci kena o nîyo. Ez tîya de behsê bedilyayîşê merdimanî yê kêfî kena.
Sênîg herkes zanî hemin çî, şert û mercî bedilyenê çimke ruhê xoza de quraleko newîn est o labelê xoza bedilyayîşê xo goreyê xo kena û bedilyayîş rêki ra nêkena. Hesabê hemin çîyan kena û hewcetî ra bedilyena. Him zî hewcetîyê hemin çîyan hesibnenan.
Elbet tebatê/tebîetê merdiman de bedilyayîş esto la mîyanê pergalê/sîstemê xoza de ganî bibo. No bedilyayîşê ko ez bahsê ci kena goreyî xoza nêyo, tewirê ko bîn de lazûbez û zirarin o. Him zirarê merdiman him zirarê merdimatî him zî zirarê xoza tedi est o.
Xoza verê nê ziraran de xo ver dana. Zirari ke gineno ci xo mîyan de helînena. Çîyo pîs wena, ma pawena labelê zirar û xirabî zef bo xitimyena. Ganî na xal/nokta de merdimê baş verê xirabî de xo ver bidî.
Belê, helbet merdimê wahar zanayî û wîcdan xo ver danî. Nê însanî, hemberê xiravî û zirarîyê merdimê menfeatperestan hetê holî û başî de ca genî. Tewir tewir sazî û komeleyan de xebatan kenî. Wazenî çerxê xoza bipawî labelê merdimê xirav zî xo verdi de nêvindenê. Semedê qezencê paran û menfeatê xo wazenê çerqê xoza sey xo biçeriqnî. Ez bawerkena têna hetê şênberî (maddî/somut) de nî, hetê ezberî (manevî/soyut) de zî no qeîde tê gerenî. Mesela çi fikir û ramanî estî heminan înkar kenî. Nêşkî înkar bikî wazenî bîgerî hetê xo. Pêy sermîyanê xo/peranê xo hemberê niştoxanê zanistî de xebatan danî kerdiş, kitaban danî niştiş. Ge ge pêy rûşvet wazenê kitabanê niştoxanê bîgerê hetê xo. Tayê nê merdiman zî weşanxanan akenê û biperan heqê weşanîyê nê niştoxan hêrînenî û sey xo weşanenî. Ez eşkarena vacî derd û kûlê nê merdimanê xiravan têna menfeatê înan o.
Nê merdimê nebaş gûnahkarî, xetadarî la xemê înanî nîyo çimke cayê înan de peri û sermîyanî her çîyî û vernîyê hemin çîyan de yenî. No zelal o û armancê înan herkes zanî la ganî ma sebikî?
Ma ganî aşkera vacî ma waharê xoza nêyî, ma yew hetê/perçeyê xozayî. Ayê diyin ma ganî cayê xo dîyar bikî û hemberê xiravan de vinderî. Roj bi roj xo hetê zanayîş û îlmî de averd berî. Hemin merdiman sazîyan de kom bikî, komeleyan de xebat bikî, raykerdişê xebata baş û feydayin zedebikî.
Ma ganî na felsefe xo vîra nekî. Benokê dewlemendîyê merdimê xiravan esto la ma şarî û ma zafî. En muhîm o yo ke ma mafdarî. No semed ra her roş ma ganî dahanê baş, jehat û hîşar bî. Eg ma hîna tê bigerî, ma ser kewenî û hemin xayînî, dek û dolabanê merdimanê xiravan binate ra kenî.
Xo vîra ra mekenî. Xecî cayê ma, erdê ma û xoza çîkê ma çinî yo. Dewlemendîyê ma peri û pol nêyo, sermîyanîyê ma xoza bi xo ya. Ma bi dewlemendîyê xoza ra weş î, xoza bi waharvecîyayîşê ma ra weş a. Eg ma weş bî xirav û xiravî çinbena. O gama cûyayîş zî bi tamê ko weş beno.
