Her ca de û her ware de sazîyê sîvîl estî. Ma eşkarenê vacî dêsê her avayîyan/bînayan de çend hebî nîşaneyî/tabelayî est ê. Nê sazîyan çand û huner ra bîgerenê hetanî sporî; hêtkarî ra bîgerenê hetanî oldarî cayê xo nîşan danê. Tayê sazî hetê hukimatî yê û paştdayîşê polîtîkayê eyî kenê, tayê sazî zî xebatê înan kêm vînenê, wazenê ey dûz kê, dijî/qarşîyê hukimatî yê û xo bi nameyê muhalif name kenê. Sazî ke polîtîkayê hukumatî pejirînenê/qebûl kenê wa cayê xo de bê. Ez ê sazîyan ser çîk nêvana çimke ez înan dir nêcûyena û mîyanê polîtîkayê înan de nîya. Babetê nişte zî ê sazî nîyê. Nişte ser sazîyanê muxalîfan o û ez wazena derheqê înan dir tayê çîyan binûsî. Yanî no nişte der û dormaleyê ma ser ra yo û vengê xorexne yo.
Heke ma hetê homarî ra bianîye pa, sazîyê muxalîf zafê labelê xebatê zafînan têna ser tabela de ya. Yanî têna est ê. Nîşaneyê/tabelayê înanî, reng bi reng î, tewir bi tewir î labelê rengdarîyê înan serê tabelayan de mendo. Tayê înan zî hetê xebat ra est ê la xebatê xo dir sist ê. Mixabin ma ameyê kerta dewlemendîyê şikil û şemal la feqîrîyê kar û xebat. Yanî ma estî la ma çinî, ma ge estê ge çinî yê; derd û kulê ma est ê la çareserkerdişê nêyan çinî yê.
Ma dem bi dem vecîyenê ser sûkan, qêrenê, wazenê la nê deman ra pê ma kewenê qûlê keyeyanê xo. Veng berzkerdişê ma, rojê şermezarkerdişî de est o, ma vecîyenê sûkan labelê xoverdayîşê ma o ca de maneno. Birastî ma têna çimê qerayîş û sloganan bianî pa, her roj de vengê ma berzo la mîyanteyê sinorî de maneno.
Hina nêbeno. No ma rê bes nîyo. Ganî ma pirsgirêkanê şarî çareser bikê, rayêkê çareserî bimojne ra û pêşnîyazan bikê. Bûyerî hetanê nika bîyê helbet hetê ma ra ganî bêro şermezarkerdiş la ver/tedbîr girewtiş elzem o. Ganî ma her ware de çareserkerdişî ser de vinderî. Şarê xo na xal de şîyar verdê.
Xalê çareserkerdişî de xebata girde ha milê rêveberanê sazîyan da. Zaten rêveberî na yê wazeno. Ganî rêveberî, her mesele de vernî de bê û şarê xo rê raye akerê. Bi fikir, raman, qisedanê xo mêjîyê şarî zelal kê û en zef zî pêy pratikê xo en vernî de gam bierzê. Şarê xo rê raye akerê, înan der û dormalayê xo de kom bikê. Pîya înan bibê yewveng, pêy vengê xo bibê meneyê/egelê polîtîkaya xetayîn û çewt ê hukumatî.
Rewşê şarî verî çiman da. Ûmûmîyê şarî, bin polîtîkayê hukumatî de zor û zehmetî da yê. Şarî rê waharî lazim a; şar, bêwahar nêbeno. Waharîyê şarî pê zanayîş û aqilmendî bena. Heke merdimî vanê ez rêveberê şarê xo ya ganî her dem de hîşar bo û her tim berjewendîyê/menfeatê şarê xo ser vindero. Heke hina nêkeno o gam ganî rêveberî nêko.
Helbet rêveberî xoverdayîn, cêhat û waharî pratika xort est ê. Şarê ma hayedarê înan a. Armancê ma xiravkerdişê ê merdiman nîyo. Derdî û kulê ma zêdkerdişê înan o. Ma wazenê hemin rêveberê şarî wa wina bê.
Belê, hetanê nika şaro feqîr ser, zef çîyê nebaş derbas bîyê. Kam wazeno ewro ra têpîya nêbaşî şarê xo rê nêro, ganî tim û tim hîşar bo. Sazîyanê xo teslîmê merdimî heq kenê, bikê. Înan ra xebat biwazo, bibeşdarîyê xo vengê înan xûrt biko. Çimke kam waharîyê rêveberanê sazîyan biko, rêveber zî waharîyê înan û sazîyan keno. Dûrvindetiş çare nîyo.
Cûgeh bedilyaya. Şarê cûgeha modern zî sey verî nîyo. Him wareyê abori de him wareyê demokrasi de aver şîyo. Têkilîyê no zanayî de ma ganî bizano sazîyê sîvîl mekanîzmayê cûyayîşê modernê. Derfetê kontrolê rêveberanê devletî û hukimatî danê şar. Him ver vindertişê xirabî de him awankerdişê başî de destanê merdimê sîvîl kenê xûrt. Ma ganî no derfet ra feyda bivînê. Pêy rêxistenanê raşt, dima rêveberanê aqilmend û zanayan ma ganî sazîyanê sîvîlan lingan ser vindarinê û xebatê înan tim û tim xûrt kê. Xo vîr ra mekenê, ma çiqa estbê rêveberê baş û zanayî hindek est benê.
