Mursel BEK
Şarê ma rê averbîyayîş pêwîsto. Hemin beşan de hemin waran de hemin cayan de… Taybetî warê ziwan û çandî de… Nê hûrdî waran de baro giran ho milê hûnermendan, mamosteyan û zanayan de yo. Mixabin şarê ma nê hetan ra waharîya esasî nêvînena.
Belê, hûnermendê ma, mamoste û zanayîyê ma bêgûman xebat û gûrî kenê. Her kes goreyê derfetê xo têgereno labelê no babet de xeta kenê û tesîrê xetanê înan dana her cayê cûyayîşê ma. Çimke nê normal merdim nîyê. Merdimêko normal xetan biko hindêk nêkeweno verê çimanî ra labelê xetadar hunermendî û zanayî bî mesele bedilyena. Çimke berpirsyarîyê înan cîya ya, cayê înan mîyanê şarê ma de cîyayo.
Rexneyê mino ewilîn zanayî, niştox, wendox û mamosteyan rê yo. Dima, rexneyê mi hûnermendan rê yo. Belê, ez ked û xebatê her kes vînena û înkar nêkena labelê warê ziwan de kêmasîya înan esta. Înan ziwanî rê sînorêk anto. Nê merdimî têna der û dormaleyê xo dir, têna dema xebat de ziwanê xo dir qalkenê. Xêcî polan û dîkan/sehneyan ziwan nêşixulnenê. Ganî nê merdimî tim û tim baldar bî. Şarê ma qîmet dano înan, ked û emegê înan şopnena. Taybetî xort û keyneyê ma dima têgerayîşê înanî şinê, goş nanê vateyê înanî ser.
Mixabin, înan bidestanê xo, ziwanê kurdî rê sînorêk anto, cayêko teng viraşto. Sinif û sahneyan de binateyê ziwan û şarê xo de sînor xêz kerdo. Ez dubare vana. Muheqeq xebat kenê, bahsa giringîya qalkerdişê ziwanê xo kenê. Bivengêko weş û nermik nêrîn û fikiranê xo anê ziwan la nê vateyanê xo zerrê sinifan de hefskenê, sehnayan de bêwahar verdêne. Mesela, seatan zerreyê polan de ders danê, zanayîşê xo yewbînan dir parve kenê, gama vecîyenê teber dest biziwanêko bîn kenê. Aşman zor û zehmetî de pirtûkan nisnenê la mîyanê şarê ma de qalkerdişê înan gereno ziwanan bînan ser. Hûnermendê ma zî no qeyde yê. Seatan ser dîk de pêy vengê xo yo weşik û germin dêran vanê. Aqilmendîyê şarê xo kenê, bi vengêko berz bangawazîyê şarê xo kenê la sehne ra bêrê war xo bedilnenê. Mîyanê şarê xo de cûya xo yê normal de ziwanan bînan dir qal kenê.
Wina nêbeno. Înan ra gêrî, ziwan têna polan de ganî bêro şixilnayîş, têna sahne de û dema kêf û kaykerdişî de bêro şixulnayîş. Merdim vano qêy ziwan çerezê kêf û evînî yo, pêlingê/merdîvenê karîyerê înan o.
No xeta yo, no ziwanî rê sînor antişo. Ganî merdim bêsînor, her ca de ziwanê xo bişixulno. Xêci no fikir hemin fikirî menê yê/bahaneyê.
Belê… Na xeta ganî werte ra bêro berzkerdiş çimke sînorê şixilnayîşê ziwan çinî yo. Ziwanê dadî her ca de, her merhale de, her gurî de ganî bêro şixilnayene. Helbet no gurîyê ma hemin kesan o labelê taybetî kar û gurîyê zanayan û hunermendan o çimke qal û têgerayîşê înan yenê şopnayîş.
Sînorê ziwanê dadîyê xo berz bikenê. Heke şima îlakan sînorêk ancenê, binateyê xo û ziwananê xêrîban de biancenê. Heke ma wina têbigêrî ma ser kewenê. Hunermendî, aqilmendî û zanayîyê şarê ma zî wina têbigêrê him ê vînde nêkenê û vînde nêbenê, him şarê ma him zî ziwan û hunerê ma vînde nêbenê.
