Çewlîg de çîko newe qewim ya. Aşkereyîyê çapî yê Bonglo/Solhan de Baroya Çewlîg ca girewto û serokê baro nişteyê aşkereyî wendo.
No, yeno çi mena?
No, hetê heq û seyyewbînî/edelet rê zef girîng o/muhîm o. Baroyî cayê xo ramojna û hêzê/quvvetê qanûn û zagonî ardo vîre.
Sîyasetmedarî û îdarekerdoxî ganî bizanê qanûn, zagon û huquq serê hemin çîyan ê û mafê cûyayîşî pawenê. Xoza de çiyê est ê, heq û huquqê hemin çîyî est ê û ganî merdimê çimvêşan, nê çîyan asteng nêkê. Semedê menfeatê merdimêk an zî şîrikêk/şîrketêk heqê tu çîyê berz nêbeno. Kam çi kar û xebat keno, wa zirar nêdo xoza, nêdo tu çîyî.
Tabî, zerrê merdim nê talanî wazena nê zî xeberanê wina la heke xirabî bibê waharvecîyayîş zef giring o û elzem o. Hem waharvecîyayîşê şarê ma hem zî komel û sazîyê sey Baroyê Çewlîgî…
Spas serok û rêveberê Baroyê Çewlîg rê…
Xebera Xêrîn û Weş
Nêweşxaneyê Dolet yê Çewlîg, statûyê “Cigêrayîşî” girewt o. Erê bi la kam bîyo sedem heminan rê spas.
Xêrîn bo, oxirîn bo!
Bêgûman merdim nêwazeno wa çew nêweşî bikewo la kamî nêweşî bikewê, îmkanê tedavîyê înan hîra bîya. Çimke hem hetê teknîk hem zî hetê qadroyê xebatoxan û doktoran ra dahanê zef îmkan virazyeno. Bi xêrî û silametî temam bibo şarê ma no neweşxane ra îstîfade kena.
Homa yo ezîz û şan xebat û xeberanê wina baş zêde biko û xirabî û vengê xiraban zî bibirno/qut biko.
Çi Zirar Dabê Şima?
Mixabin no hewte de çîko zerreyê merdim dejneno qewimîya. Gexî de hîrê heşî kişyeyê! Çew sedemê na mesela nêzano. Hîrêhemin haşî, cayê çar û çop erzîyeno ci, ameyê kiştiş.
Heqê cûyayîşê hemin heywanê koyî est o. Ganî no bêro zanayîş. Mixabin kiştişê heşanî ver, çew sewtê xo nêveto. Rewşa bêvengî, kiştişê heşanî zefêr zerreyê merdim dejna. Taybetî merdimî ver ra talanîyê xozayî sare berz kenê, na mesela nêgirewtê rojevê/raverîyê xo.
Çîkêk ganî reyna bêro vatiş: Her ganî/gonî cûyayîş heq keno. Merdim sênî mafê xo wazeno û paweno gera/ganî heqê hemin ganîyan bipawo. Çimke her ganî yewbînan ra giredayî. Heke înan ra yew kêm bibo zirar dîyeno ê bînan ra zî. No semed ra merdim waharîyê xoza û hemin çîyan biko.
Heke merdim kiştişê heywanan ver vengê xo nêveco, pênîyê xo ano.
Xo vîr ra mekê! Dar û ding, aw, tîj, vaye, dere û derxole, heyvan her çîyî parçeyê yewbînanê û ganî cîya nêbê! Heke bibê cûyayîş zirar vînena, xoza xeripyena!
