Hefteko derbas bi vewre/vore vara. Henzar bar şikir Yezdanê dilovan rê ke vara. Çimke varayîşê vewreyî xoza rê, merdiman rê, sewalan/heywanan rê, vaş û vilikan rê, dar û ding rê, kerre û kuçikan rê girîngo/muhîm o. Çimke vewre nêvare nê çîyan ra yew çî nêbenê.
Bêguman varayîşê vewre pîya xo ra hewa/vaye bedilna. Hemin ca bîyê serdin û vaye hemin cayanê welatî de kewti binê sifir. Ma eşkarenê vajê, hema hema hemin cayan de xoza seqem gireda. Pekî no çîkeko xirav o? Nê, normal o û gera hîna bibo çimke demsala zimistanê welatê ma gera hina derbas bibo. No semed ra gera ma şa bibê û xiravî ser nêceribnê. No riziqê ma yo, bê ey nêbeno.
Belê, ma eşkarenê bi demhomaran/seatan bahsî faydeyê û hewcetîyê vewre bikê labelê şarê ma nê faydayan zafîyer kewtê dima zor û zehmetîyê vewreyî. Merdim vano qey no welatî de çirê vewre nêvaraya. Temam, miheqeq varayîşê vewreyî zor û zehmetî viraşto labelê no taybetîyê welatê ma yo. Welatê ma warê vewre yo, welatê serd û seqem o. Bêguman na taybetî pîya xo ra zî zehmetî û zorî ana hola û no çîko normal o. Gera baş bêro femkerdiş eg/heke varayîşê vewre nêbo welatê ma de cûyayîş nêbena. Nê cûyayîşê însanan, nê ey heywanan, nê zî ey nebatan manena. Hetta ez eşkarena vajî semedê cûyayîşê hemin nê çîyan varayîşê vewreyî bes nê yo. Miheqeq vewre bivare la dima vewre şilî/varan zî bivare. Senî ke mi cor de niştebi eg nê çinebê nê vaşî berz benê, nê vilik abenê, nê heywanî êşkerenê biçerê, nê zî merdimî êşkeno bîna pak bîgerê.
Belê, vewre vara. Ez reyne vajî, henzar bar şikir Rebbê corîn rê vara ya. Dunya, erd û ezman/asûman bîyê pîrûpak. Xoza xo kerdi niknewe. Belê, sinîke fekê taye merdiman ra ameyo watiş, vewre pîya xo ra zehmetî zî arda. Vateyê înan raşte yo labelê merdimî cûyayîşê welatê ma yê vêrî zanê, vewra ke vêr varenê aye zî zanê, gera ey/aye çîk nê vajê. Feydeyê vewre bîyarê xo vîre û cûya xo bidomê.
Belê, vewre vara û zehmetî zî xo dir arda labelê ma gera çîyê erênîyan bifikirê. Vewre pakî ya, şoretîyê welatê ma ya, kayê sûkan a. Mesela tûtan/gedeyan bîyarenê verê çimanê xo. Xêrê vewre rê hemin sûk û mahalan de vengê kêf û eşqê tûtan berzbi. Gedeyan vewre ra xo rê şênayî viraştê û xêrî varayîşê vewre cûyayîş ra tom girewtê. Ez eşkerena vacî saye sarreyê tûtanî rê sûkê bajerî bîyê bihûşt/cennet. Him înan rê him pîlan rê… Gedeyan bi kêfê xo perdeyê binateyê pîlan û bihuşt zî berz kerdê. Bi kêf û eşqê xo bihûşte ko verê çimanê ma de sûkan de yo motê ma. Bi kaykerdişê û rayberîyê xo, peyamê “çi şert û merci de bena wa biba cûya weş a û bê menayan bicûyen.”ê da ma pîlan.
Belê, gedeyî vecîyê teber û sûke ke amebî girewtiş bihûyayîşê xo akerdê. Him rayê ma akerdê him zî fikir û ramanê ma hîşar kerdê.
Hefteko derbas bi vewre vara. Hanzar bar şikir Homa rê ke vara. Bi varayîşê xo gedeyê ma azad kerdi, kêf û eşk da zerreyê înan, şikil û şemalê dunya pak kerdi. Ez nika bi vengeko berz eşkarena vacî gerre/şîkayet mekenê. Çi şert û mercî benê wa bibê cûyayîşê xo bidomnê û ey ra tem/tom bigerê. Wazeni vewre bivari, wazeni şilî bivari, wazeni germ bivari banenê kêf, eşk û gurîyê xo ra. Qariş gurîyê Homayî mebenê. Eg şima dest ra yeno hetkarîyê gedeyan bikenê û vecînê tever. Şima taykekê bîn zî gerre bikê Homa nêko vewre ma rê bena hêrs, piz bena û şina û hîdî tewir/tor nêna! A gam gerreyê ke şima kerdê cayê xo bidê nîyazan/duayan zî çare nê virazyeno.
Bi destûrê Homayî hima zef vewre varena. Homa ma ser ra varayîşo xêrîn kêm nêko. Bimanê weşî de, bimanê warayîş de, bimanê binê hûyayîşê gedeyan de!
Mursel BEK
Mamoste/Nivîskar
