Fekî herkesî de sîyaset est o. Merdim vano qey, Çewlîg fabrîqayê sîyasetmedaran o.
No, belayê betalî yo. Çimke pergalê sîyasetmedaranê Çewlîg, wina xo pay ser vinderneno. Yanî qastî wina kenê. Feqîr û fuqarayî kerdê muhtacê xo û mecbûrê xizmetê xo.
Mixabim nê merdimê feqîr zî xo mecbûrê pawetoxê yew wekîlî vînenê û xo mecbûr hîs kenê sîyasetê înanî wila bikê.
Têna Memûrê Doletî Xebatyenê!
Însanê ma halo hezir de bê kar ê. Xebatak teber ra bena, qedîya ya û merdimî agerayê Çewlîgî. Gurîyê dewan zaten rewra qedîyayê.
Herkes bajerî de kom bîyê û bê karî ver, xerq bîyê. Heke vaye germin bo, şarî caddeyê gencî ser şino yeno. Heke vaye serdin bo herkes keweno zerre awayîyan an zî qulikêk vînenê ke te de bîne bîgerê.
Qehwexaneyî, hetanî fekî pirr ê. Taybetî, mesaîyê xebat ra dima, qehweyî ke te de kay kaybenê, hetanî goşanî benê de. Yanî memûr zî kewenê mîyanî qerebalixê betalanî. Gencî yew hetî ra okey an zî kaxidan kaykenê, yew hetî ra zî binê dûmanê tûtûnî de benê serweş. Extîyarî zî çayxane de kom benê û qal kenê. Hewê xo, pê yewbînan anê.
Belê, rewşa bajerî wina ya. Rojeva înan, sey her hewte boş a. Mi, xo rê rojevêk na ro û kewta dima. Nataûbota min pers kerdo. Gelo bajerê Çewlîg de kar û xebatê sanat sinî no?
Tew, ez çi bivînî? Sanat çinî yo ke kar û xebatê sanat bibo. Têna, çandî cayan de tûtî qiçalekî şinê dersa pîyano an zî gîtarî. Mixabin zêdeyê înan zî, bêzerr şinê. Şîyayîş û ameyayîşê înanî, bi qirarê dadîyan o. Dadî zî semedê sanat nî, semedê cûyayîşa modern, tûtanê xo şirawenî. Yanî an semedê şabîyayîşê xo, an zî qûrebîyayîşî xo tûtanî şirawenê.
Wa Yew Darê Ma Bibo!
Aşîkar o, bajerî ma de fabrîqa û kargehî çin ê. Ma tîya de mûtabiqêy la çîkî ma dest ra yenê est ê. Tew çîk nê bo, herkes eşkeno yew dar rono, di heywanan wêko. Têna ma biwazê. Heke vanê, bajer de cayê mi çinî yo, wa şoro dewê xo.
Weribenê Çew Dewa xo Ra Nêvecîyenê!
Goreyê mi, ganî çewî, dewa xo ra nêvejîyenbê. Qenî waharê erdê xo, bax û baxcayanê xo vejîyenê û kar û xebatê bav û kalanê xo domnenê.
Çîkî nêbo, waharîyê avayîyê/banê xo kerdenê, têr û tûrê ke der û dormalê banî de kom benê, parçêk nanî danê ci. Pisîng û kutîkî yê dew de bêwahar mendê, pîzeyê înan kenê mirde.
Ganî Se Bibo?
Yanî, nê çîyî hemin kar û xebatê. Têna merdim biwazo, têna merdim ced biko.
Ez hêvî kena şarê ma, qehwexaneyanê bajaranê bûyinan, ca biverdê û şorê waharîyê erdê xo bikê, binê sîwanê/çatîyê banê dewe de bi hûzûr bicûyê!
Homa pênîyê ma xêrî ser açer no!
