Hetanî derfetê mi bibo, ez xoza ra gêrena. Gêrayîşê mi yo hewte/hefte bîn de çîke balê mi anto. Zaf tewirî heywanî bê waharî xoza da nata bota gêrenê. Zerreyê mi deja çimke nê heywanî ge o hetî ra gê no hetî ra amenê fetilnayîşî.
Birastî badecû ez fikiryaya sûkî de, dewan de, serê rêyan de zî heywanê bêwaharî est ê. Amînan zimistan ferq nêkeno la taybetî zimaistan înan rê zor o. Ez bawerkena zafî înan hetê cinawiran ra yenê werdişê. Mixabin…
Çira heywanî wina bîyê bêwahar?
Çimke dem/zeman bedilya yo. Pîya bedilyayîşê xo ra tebîatê merdimî zî bedilnayo. Însan, kar û xebatê însanî, îmkan û derfetî, aborî û civaknasîyê merdimî bedilyayo. Têkîlîyê merdim û merdimî, merdim û xozayî, merdim û heywanî bedilnayo. Mesela zemano verî de têkîlîyê merdiman û heywanan yewnê qeyda bî, nika yewnê qeyda yo.
Çira wina bi? Sedemê no bedilyayîş kam o, çita yo?
Sedemê na bedilyayîşî merdimî yê. Merdimî, demo verî de semedê pawetişê gan û malê xo heywanî kêd kerdê û kerdê wê. Çimke menfeatê înanî rê wina gerek kerdenê. Nika zî çew waharîyê heywanan nêkeno, qelêkê nan û tasêkê aw nêdano heywanan. Têna tayê merdimî, hetanî heywanan kar û xebatê xo de bişûxilnê, nan û aw danê ci, badecû gûrî înan biqêdê reyna erzenê ko û heywanan pîze vêşan û têşan verdenê.
Gûna yo, zalimî yo!
Merdim, ganî nayê xo vîra nêko. Heywan zî waharî can ê/gan ê. Ê, emanetê merdimanî. Merdim sênîn, demê kar û xebatî de heywanan wazeno, badecû zî biwazo. Tew çîke nêko, qenî zirar nêdo heywanan, nêerzo teber, verê fekê cinawiran. Kam, zirar bido heywanêk ganî bizano, no zûlim o, gûna yo û Heq hesabê ey, înan ra perseno.
Ma ganî se bikê?
Vernî hemin çîyan, ma ganî merdim bê û merdimatîyê xo, heywanan ra bimojnê ra. Çi koyî benê, çi kêwî benê ma ganî zirar nêdê heywanan. Heke ma kar û xebatê xo dir bixebatnê, an zî sey kutikan pê înan mal û ganê xo bipawê, pîzê înan bikê pir û înan ra hes bikê. Sey tûtanê xo, sey cîrananê xo, sey dadî û bavîyanê xo…
