Hewteyo derbas bi, her cayî, binê aw de mendê. No hewte de zî varayîş est o, ganî her kes baldar bo!
Cayê zef varayîş girewtê, her sûk û mehla binê laye/laser de mendê. Him hetê şênberî/maddî him zî hetê razberî/manevî de zirar zîyan zef o.
Çend kesî merdê, çend kesî zî vîndebîyayê û hima tirmê yew merdimî, nêameyo vînayîş.
Çira Wina Bi?
Çimke ma aşmanê payîzî de yê. Her ca de varayîş est o. Birastî no rewşe normal o. Her çî, gorayê rewşa demsalî derdas benê la ma anormal ê.
Anormalî Ça De Ya?
Belê, varayîş zêde kewto. Yeno vatiş, m2 ra 200 lître ra zafêr varan varaya. Normal o çimke taye serrî, demsalê payîz an zî wisar de varayîş zef keweno, zimistan zî serd zef virazyeno.
Nê rewşê vayî, zagonê xoza yê û normal ê. Anormalî ma merdiman de ya. Her ca de avahî nêbena la ma her ca îşgal kerdo.
Belê, fesal/teknîk bîya hîra labelê no hîrayî merdim nêxelisnena. Fesal çiqasî hîra beno, merdimî zî wina zef xeta û qûsir kenê, xo waharê her mafî yê ser xoza vînenê. No nêbeno, çimke merdim, merdimatî waharê xo za nîyê, hetêkê xoza yê, şîrikê xoza yê.
Kêmasî Ça De Ya?
Kêmasî hîş û aqilê ma de ya. Ray û raybazê ma de ya. Pergalê cûyayîşê ma de ya. Nezanîyê rayeveranê hukimatan û dolet/dewlet de ya.
Ganî Se Bibo?
Vernîyê her çîyê, rayverî, hêz û hûkimê xoza qebul bikê. Çimke merdim waharê çi derfet bibo zî reyna verê xoza de eciz o. Hêzê xoza, bêsînor o û çîke nêşkeno verê no hêz vindero.
Çare Çita Yo?
Bajerî ma, zef qerebalixî. Her mehla û sûkan de sixletî zef a. Ganî şarê dewan, erdê xo, dewanê xo ca nêverdê û bajeran de kom nê bê. Dewlet zî çewî bi zordarî dewan ra teber nêko. Na yew rastîya. Temam, dima ameyayîşê merdimanî yê bajerî ra dima ganî se bibo?
Rêveberî, her bajer gorayê plansazîyêk ava bikê. Çew fekê dere û dorxelan de avayî nêvirazo, şaredarî destûrî yanî rûhsatî nêdo kesî. Rayê aw û vaye de çîk engel nêkî û rayê înan nêbedilno.
Nê bîyerê ke newe bîyê, reyna ramojna ma ganî deran û dirxalan ra dûr bêro vindetiş. Cayê bîyerî bîyê, nameyê xo ra kifşeyo ke nê cayî de cûyayîş nêbena. Ma şîyê verê tehlîke de cûyayî saz kerdo. Mixabin pênîyê xo, ma bi destanê xo ardo.
Hûkimat û Rayberî, ewro Ra Pê Sebikê?
Bîyerî bîyê, ma rê dersa gird ê. Teknîk çiqas hîra bibe zî çew reyna xeta nêkê. Her ca, beton nêkê. Rayeyê aw nêbedilnê. Kaş û kûlan de avayîyan nêvirazê.
Zirardayîşê dar û daristan ra dûr vinder ê. Beno ke en polîtîkaya en mûhîm a ya ke, cûyayîşê dewan bikê rehet, îmkan bidê dewijan û dewan newe ra ava bikê.
Ma eşkarenê, goreyê/gorevê rayveran zêde bikê la merdim zî ganî hîşê xo kom bikê û çimvêşanî ra dûr vindero. Heke wina nêkê, cûyayîşê her kesî zirar û zîyan de monena. Çew cêyayîşî ra tem nêgeno, xêr xo ra nêvîneno.
Homa, xoza ma merdiman dest ra bipawo!
