Hewteyê derbasî de çendî çalakî û aşkerayîyê çapî bîyê. Mixabin xecî meşê Yew Gulanî beşdarvanî zef nêbî labelê merdimê beşdarî bîyê xo ra bawer bê û waharê moral bê.
Semedê her weşî û paşdarîyan beşdarvanan pîroz kena.
Mixabin kêmasîyêk nê xebatan de est a. Na kêmasî taybetî demê eşkeredişê çapî de xo mojnena ra. Kemasî beşdarîyan de ya.
Mixabin merdimê ciwanî, beşdarî xebatan nêbenê. Beno ke şima vacî zerreyê hewte de eşkerekerdişî beno no semed ra yo la pênîyê hewte de zî rewşe nêbedilyena. Çimke mi xûsûsî baldarî kerdo, bedilyayîşê demî zî beşdarîyê ciwanan ser tesîr nêkerdo.
Gelo çira wina yo?
Civanî kêf û eşq wazenê, şahî û raqis wazenê. Çîyo pê eciz benê, têpîya de vindenê nêwazenê. Çimke hemin eşkerekerdişan de zulim, îşkence, koyîş û kiştişî yenê qiseykerdiş û hemberê nê çîyan de nêrazîbîyayîş yeno nawnayîş.
Na rewşe, weşê civanan nêşina. Civanî nê wazenê bibê şahidê çîyê xirab nê zî wazenê beşdarê nê bîyeran/meseleyan bê.
Pekî no çîko hol o?
Nê, ganî civanê ma hayedarê hemin çîyan bê û en ewil ê nêverdê çîyê nexêr û xirabî biqewîmê. Him pêy xebatanê başan, sey hûner û çandî, him zî pêy waharîyê şarê xo ganî mîyanê kar û gurîyî winayan de bê. Bê civanan nê xirabî yena asteng nê zî başî saz bena. Çimke ruhê civanan sey dînemo yo û ganî civan tim û tim vernîyê şarê xo de bî.
No esasî de mecbûrîyet o. Sênî şahî de civanê ma her ca ra benê vila û bi kêf keremê xo demê xo kenê dem, rojanê muhîman/girîngan de, rojanê tengan de zî beşdarê eşkerekerdişan û xebatan bînan bibê.
Tîya de ma ganî bike dima na perse. Gelo kêmasîyê pîlan tîya de est a an çinî ya?
Est a, him zî zef est a. Merdimê pîl, taybetî bav û kalî, semedê antişê ezîyet û derdê xo, nêwazenê tûtê xo nê ezîyetan biancê. Goreyê înan nivşa newe çiqa nê meselan ra dûr kewo hinde hol o. Bi no tewirî, wazenê tûtanê xo bipawê.
Mixabin no raşt nîyo. Nîyet baş bo zî pratîk de raşt nîyo. Merdim hetanî pêrûpîya xo ver nêdo, tu encamo baş nêşkeno dest ko. Heke cinî û camerdî, lac û keynayî, kal û civanî pêrû yew ref de ca bîgerê hima/ancax reynê çîyo nexêr, nebaş nêbeno.
Kêmasîya bîn zî rêveberan da ya. Rêveberî, têna ewroyî fikiryenê. Çew nêvano sibayerê şarî û sazîyan sebeno?
Her rêveber ganî sibayerê sazîyan bifikiro. Ganî vaco, siba merdim bibê ke bikewo herindê ma. Yanî xo ra dima nifşa teze ra civanan bihadirno.
Yanî, her rêveber, sey merdimo zanayî sazîyan sey dibistan, her civanêk zî xo rê sey şakirt/talebe bibîno. No ameyayîş pîya civananê ma, ma rê, sazîyanê ma rê zî bifeyda yo.
Sibayo baş, aramî û holî pîyatêgerayîş de yo. Pîyatêgerayîş zî pê beşdarîyê hemin kesan û her seran ra merdimî beno. Ma ganî her kes pîya kuzî kûlfetê xo beşdarê xebatan bo. O gama ma eşkarenê vacê sibayê ma xelisyeno.
